Shadow

Sunod-sunod ang insidente sang kinawatay, kalabanan sa mga ginakawat mga bisikleta

Martes mga las dos sang kaagahon…makita sa sini nga CCTV footage sa may Carmela Valley Homes sa Barangay 12A sa Talisay City nga may naglabay nga isa ka Adventure. Nag pondo sa unhan. Kag sunod sunod na ang pagnilabay sang apat ka mga lalaki.

Kuha ini sa unhan lang sang balay nanday Ember Jean Diaz.

Suno kay Ember, sang amo nga mga inoras naka bugtaw siya kay nagpainum siya sang bulong sa iya nga lapsag. Ang iya tiya naka bugtaw man kag nakibot sila nga naga sige tinaghol ang ila nga mga ido sa sulod balay.

Pagka aga ila natukiban nga gin sulod na sang kawatan ang ila nga garahe kag ginkawat ang bike kag yabe sang motorisklo. Gintaklas ang ila nga gate kag ginbuksan ang lock.

Kagab-i may isa na naman ka puti nga van nga naga balik balik sa gwa sang ila nga balay.

Wala na ini maka pondo. Duda niya basi ang motorsiklo naman ang gina bantayan.

Suno sa kay Barangay Kagawad Rhijun Laupos, ila na nga gina pahibalo ang mga residente sa ila nga barangay nga mag ulualigmat kay bisan sila mismo naka balita man nga sunod sunod man ang insidente sang kinawatay sa Bacolod.

Sang Huwebes, mga pasado las dos man sang kaagahon sa gihapon ginkawat naman ang ini nga bisikleta ni Quinz Anderson sa Celita Village sa Barangay Alijis sa bacolod.

Isa man ka Adventure ang nakuhaan sang CCTV footage nga amo ang ginkargahan sang kinawatan nga bisikleta.

Sabado mga pasado las kwatro sang kaagahon ginkawat naman ang ini nga mga bisikleta ni Ronnie Gutierrez sa corner Sta. Isabel-Josefina Streets, Eroreco Subdivision sa Barangay Mandalagan.

Naga panawagan ang tag iya sang bike sa kun sino man ang maka hatag sang impormasyon sa kun diin gindala ang mga bisikleta kay may ihatag sila nga reward money.

Sa Barangay Bata naman sa Bacolod sadtong Nobyembre diyes…ginsulod man sang tatlo ka mga lalaki ang balay ni Hazel Peconcillo.

Naka bugtaw ang tagbalay bangud man sang taghol sang mga ido.

Na abtan sang isa ka tagbalay ang tatlo ka mga lalaki kag gilayon man ini sila nag dinalagan palagyo.

Radyo ang nakuha sang mga kawatan kay naka bugtaw ang mga tagbalay.

Ang amo nga mga lalaki ang nag dali dali sakay sa isa ka puti nga van.

Ang Bacolod City PNP ang naga usisa na sa serye sang kinawatay nga nagakatabo.

Secured By miniOrangeSecured By miniOrange