Wala pa opisyal nga nagsugod ang summer pero tuman na ang kainit nga mabatyagan sa Pilipinas. Sa press conference kaina sang udto sang weather bureau nga PAGASA, ginsiling ni Nathaniel Servando, ang administrator sang PAGASA nga strong El Niño na ang mabatyagan sa karon kag ini ang maga lawig tubtob sa bulan sang Mayo.
Subong nga adlaw, Marso 7, sa weather forecast gin bulubanta na sang PAGASA nga yara sa 32 degrees celsius nga temperatura sa Visayas kag 40 degrees celsius ang heat index sa Negros Occidental. Ang heat index amo ang measurement sang kainit nga mabatyagan sang tawo.
Sa Iloilo yara sa 42 degrees celsius ang heat index kag 43 degrees celsius naman sa Roxas City.
Subong pa lang gina siling na sang PAGASA nga dako ang posibilidad nga mag develop ini sa La Niña sa bulan sang Hunyo.
Kun matabo ini, mas diutay ang pag ulan, ma neutralize sini ang El Niño. May mga lugar sa gihapon nga maka eksperyensya sang dry spell kag drought bisan bulan na sang Hunyo suno sa kay Servando.
Dugang pa niya, ila nga gina lantaw nga ma delay man ang pag sulod sang rainy season ukon maulanon nga panahon.
Bangud sang epekto sang El Nino, ang mga lugar sa Bacolod nga gina kulang na nga daan sa supply sang tubig ang mas nakulangan pa gid karon sang water supply gani nag sugod na ang Bureau of Fire Protection sa pag rasyon sang tubig.