Gin vandalize ang pila ka mga street signages sang Bacolod Traffic Authority Office ukon BTAO sa dalan Lacson kag iban pa nga lugar.
Ini ang ginpalab-ot sa Bacolod Traffic Forum nga page sa Facebook.
Iban sa sini nga mga traffic signages gin-donate sang mga pribado nga indibidwal.
Gani suno sa kay Patrick Lacson, officer-in-charge sang BTAO, magapangayo sila sang bulig sa pulis mara mapatuman ang Anti-Vandalism Ordinance sang siudad.
2011 sang gin aprubahan sang Sangguniang Panlungsod sang Bacolod ang ordinansa nga nagadumili sang vandalism kag ini ang gin amyendahan sang 2014 paagi kay anay Konsehal Atty. Jocelle Batapa-Sigue.
Sa idalum sang ordinansa, ang violator ang magabayad sang iya gin vandalize nga propiedad, may 3,000 pesos tubtob 5,000 pesos nga penalidad kag pagka preso nga tatlo ka bulan tubtob isa ka tuig depende sa nahimo nga bayolasyon.
Ginpang tinluan na sang BTAO engineering section ang nahalitan nga mga traffic signages.