Ginpasirad-an na sang Bacolod City Administrator’s Office ang annex building sang Libertad Market matapos nga gin-clear ini kahapon gikan sa mga iligal nga naga-istar diri.
Ginsiling ni City Administrator Atty. Mark Steven Mayo nga ila anay pagatinluan ang amo nga building agud maplastar nila ang posible nga ubrahon diri para mapuslan sang mga vendors.
Isa sa mga ginatanyag sang siudad amo ang pagsaylo sang mga vendors sa gwa sang merkado sa sulod.
Sandig sa record sang Administrator’s Office, may masobra 90 ka mga stalls ang yara sa ground floor sang annex building apang, 45 palang diri ang tigayon na nga na-award sa mga vendors.
Samtang ang 115 naman ka stalls sa second floor sang amo nga building, ang wala pa gid mahatag sa mga vendors.
Ini nga mga stalls ang plano sang siudad nga itanyag sa mga vendors sang Amelia-Mercedes Vendors Association nga nagabaligya sa gwa sang merkado kag makapila na ka beses nga ginpapahigad sang City Legal Office bangud nagabalabag na ini sa dalan.
Miyerkules nga adlaw, 97 ka mga stalls sa sulod sang merkado ang gin-clear sang siudad bangud gina-istaran na ini sang mga street dwellers.
Ginabulubanta 40 ka mga indibidwal lakip na ang mga rugby boys ang nagatinir sa amo nga mga stalls.
Suno kay Mayo, wala pa sang may interesado nga mga vendors nga magrenta sa second floor sang annex building bangud indi sila maka-income kon sila ang napahamtang sa amo nga mga stalls.
[sibwp_form id=1]