Indi magnubo sa 400 ka sako sang bugas ang ginadiskarga sa stage sa atubang sang Bacolod City Government Center kada adlaw.
Pero kaina temporary nga na-delay ang paghakot sang mga bugas matapos nalusod ang bilog nga stage tuga sang kabug-aton sang sinako nga bugas.
Wala sang nasamaran sa insidente. Pero natungod sang hitabo ginsiling ni Brenda Burdeos, pamuno sang City Cooperative and Livelihood Development Office nga na i-rekta sa sulod sang BCGC ang ginadiskarga nga bugas.
Nag-gwa nga sa stage ginatipon ang sako sang bugas para isa-isa nga makilo antes ini ipang-repack kag i-deliver sa mga barangay.
Ang supply sang bugas ang ginabaligya sang Bacolod LGU sa tag-P20 per kilo kabahin sang rice program sang national government upod sa Department of Agriculture.
Ginsiling ni Burdeos nga sa karon nagalab-ot na sa masobra 2,000 ka sako sang bugas ang na-roll out kag mahimo nga indi na makalab-ot ang supply sa Hulyo.
Ang siudad ang nagbakal sang masobra 5,800 ka sako sang bugas nga amo ang ginabaligya sa mga senior citizen, persons with disability, indigent families kag katapo sang vulnerable sector.