Sangguniang Panlungsod ang naghiwat sang committee hearing sa reklamo sang mga pumuluyo sang tatlo ka mga subdivision sa Bacolod City batuk sa ginatukod nga tower sang mga telecommunications company sa ila tagsa ka mga lugar.
Bilang pamuno sang committee on information, communication and technology sa konseho, ginpamati-an ni Councilor Al Victor Espino ang sentimiento sang mga pumuluyo gikan sa Purok Himaya, Barangay Alijis, St. Therese Avenue, Dona Juliana Heights sa Barangay Taculing kag Hermilinda Homes Subdivision, Barangay Mansilingan.
Ini matapos nga nagpabutyag sila sang kahangawa sa mahimo mangin epekto sang cellsites sa ila ikaayong lawas.
Ginpahayag ni Espino nga may yara karon sang isa ka joint memorandum circular ang Department of Information and Communications Technology nga nagpahapos sa proseso sang mga telcos sa pagpatukod sang ila tower sa pungsod.
Pero bangud nagpadangat sa konseho ang mga pumuluyo sang reklamo batuk sa tatlo ka mga cellsites, kinahanglan nga magpagwa sang resolution of no objection ang SP para mapadayon ang pagtukod sang mga tower sa tatlo ka mga barangay.