Guidelines angut sa pagkumpiskar sang mga produkto sang vendors igaduso sa konseho.Wala pa naka reklamo ang mga manugbaligya sa Libertad Market angut sa nagakadula kag indi nila ma-claim nga produkto sa City Legal Office Enforcement Team, nakahinyo na sang paathag si Councilor Celia Flor sa enforcement team angut sa mga basehan sa ginapatuman mga pag confiscate sang mga produkto sang nagapasaway nga vendors kag kun paano ini gina dokumento.
Siling ni Flor nga amo ang pamuno sang Committee on Markets and Slaughterhouse, nagakadapat kuntani nga mag issue sang resibo ukon violation ticket ang enforcement team sa ila gina pang confiscate nga pagkabutang kag produkto sang vendors.
Nagapati ang konsehal nga magaserbe ini nga basehan sang vendors para sa pagbayad sang penalidad antes mabawi ang mga confiscated items.
Para sa konsehal nagakaangay lang nga tagaan sang penalidad ang mga vendors nga naga supak sang Vending Ordinance.
Nagligad lang nga Martes sang nagpatuman sang clearing operation ang enforcement team sa palibot sang libertad market pati na sa Bagsakan area.
Pero nagreklamo ang pila ka mga manug isda sang wala nila mabawi ang ila produkto kay gin-alegar ginluto kag ginsud-an na sang enforcement team.
Nakuhaan pa sang mga vendors sang litrato ang pagsugba kag pag prito sang mga nakumoiskar nga produkto sang enforcement team.
Pero ini ginpanginwala na ni enforcement team leader Rey Demisana nga nagsiling nga ginbakal sang team ang ila sulud-anon kag pila sa mga isda nga nakuhaan sang litrato ang gin donate sang mga vendors nga naapektuhan sang clearing operation.