2019 sang na ratify sang konseho sang Bacolod ang deed of donation sang Vallacar Transit Incorporated para sa walo ka ektarya nga duta sa Barangay Alijis nga natalana patukuran sang South Public Terminal.
Pero suno kay Mayor Albee Benitez naga pabilin sa status quo ang plano samtang nagapangita ang siudad sang lugar nga mas viable kag visible sa mga public utility vehicle operators kag pasahero.
Si Councilor Jude Thaddeus Sayson ang nagduso nga sa Barangay Sum-ag nagakaangay itukod ang south terminal. Pero may mga drayber kag pasahero nga wala naga pabor diri.
Base sa kasugtanan sa tunga sang siudad kag bus company nga gina panag-iyahan sang Pamilya Yanson, indi pwede gamiton sa iban nga purpose ang gin-donate nga duta magluwas lang sa terminal.
Indi man ini pwede ma transfer kag mabaligya sa iban ang propiedad. Sarang man mabawi sang donor ang duta kun indi matigayon ang kaundan sang kasugtanan.