Kambyo sa liderato sang Senado ang gin patuman karon nga adlaw.
Samtang, liwat naman nga naga gwa karon ang ngalan ni Bacolod Congressman Alfredo Abelardo “Albee” Benitez para sa house speakership.
Nanumpa na bilang bag-o nga Senate President si Vicente Sotto, III, sini lamang nga hapon kag gin tal-usan si Senador Chiz Escudero.
Naga preside si Escudero sa session sang gin move ni Senador Juan Miguel Zubiri nga i-declare ang position sang Senate President vacant.
Siya man ang nag nominate kay Sotto. Wala sang iban nga contender sa amo nga position.
Nag pa butyag naman si anay Senate President Escudero sang iya nga pag pasalamat sa kasubong niya nga mga senador nga nag butang sang ila pagsalig sa iya nga liderato sa 19th kag 20th Congress.
Nahangpan niya kag gina respeto ang desisyon sang majority sang iya nga kaupod kag iya nga gina panginbulahan si Sotto.
Wala siya sang kalain sang buot suno sa iya.
Sa pihak nga bahin, liwat nga naga gwa ang ngalan ni Bacolod Congressman Benitez para sa house speakership.
Sang gin pangayuan reaksyon sang Domingo, ginsiling ni 3rd District Representative, Javier Miguel “Javi” Benitez nga anak ni Congressman Albee nga ini ang maga depende sa presidente kag sa mga lideres sang kongreso magluwas kay House Speaker, Martin Romualdez.
Suno kay Javi iya nga nasiling ini bangud nagapati siya nga indi man pagduso ni Congressman Albee ang iya kaugalingon kun indi man luyag sang mga tawo ini.
Mahimo nga nag gikan man ini sa mga house members nga naga pangita sang pag bag-o kasubong man sang stability.
Balantayan na lamang suno kay Javi kun ano ang matuod nga sentimiento sa kongreso sa masunod nga mga inadlaw.