Sa anum ka nabilin nga mga inadlaw antes mag piniliay, kampante ang kampo ni presidential candidate Ferdinand Marcos, Jr sa Negros Occidental, nga siya ang mangin madinalag-on.
Para kay BBM-Sara spokesperson, anay mayor Sonny Coscolluela, ini ang hayag base sa mga surveys sang nagkalalain lain nga mga survey firms kun sa diin ang resulta ang naga pakita nga kadako sang biya ni marcos sa iban pa gid nga mga presidential candidates.
Sa pinaka ulihi nga pulse asia survey, nga ginpatigayon April 16 to 21, 56 percent ang rating ni Marcos, 23 percent naman ang kay VP Leni Robredo.
7 percent si Sen Manny Pacquiao, 4 percent si Mayor Isko Moreno Domagoso kag 2 percent si Senator Ping Lacson.
Wala labot diri, suno kay Coscolluela, ila gina paabot ang pag deliver sang 28 ka mga alkalde kag lima ka mga congressmen sa Negros Occidental sang ila nga ginsaad nga suporta kay Marcos.
Ini bisan pa nga may mga alkalde nga ang ila asawa naga suporta kay Robredo. Indi ma negar suno kay Coscolluela nga sa probinsya mga elitasta ang kalabanan nga naga suporta kay Robredo.
May panawagan man siya sa mga taga Negros: Ang kadalag-an ni Marcos kadalag-an man sang mga Negrense labi na nga ang pamilya sang asawa ni Marcos, nga si Liza Araneta-Marcos ang gikan sa Bago City.
Ano man ang mangin resulta sang May 9 elections kuntani ang mabaton sang tanan kag mag untat na ang ano man nga kainit nga natuga sang pamulitika.