Isa patay kag isa ang pilason sa bahin sang Philippine Army sa nagluntad nga engkwentro kahapon sang aga sa Sitio Agdalusan, Brgy. Jayobo Lambunao, Iloilo.
Suno kay Lt. Col. J-Jay Javines, spokesperson sang 3rd Infantry Division Philippine Army, napulo ka mga miyembro sang Communist Terrorist Group ukon NPA sa idalum sang Baloy Platoon, Central Front Komiteng Rehiyon – Panay ang na-engkwentro sang 82nd Infantry Battalion. Isa ka Private First Class ang napilasan kag ang isa ang Killed In Action.
Ginkilala ang napatay nga si PFC Mars Echevarria kag tumandok sang Ilog sa Negros Occidental. Ang pilason naman ginkilala kay PFC Jomarie Llesis sang Cauayan sa Negros Occidental kag luwas na sa katalagman.
Suno kay Javines naga patigayon sang focused military operation ang 82nd Infantry Battalion sa katupad nga barangay sang Cabatangan, sang may nabaton sila nga impormasyon nga may katapo sang rebelde sa Brgy. Jayobo rason nga ginkadtuan nila.
Kaina sang aga may nasapwan man nga bangkay sang gina patihan NPA nga napatay sa encounter.
Na-recover sang Philippine Army sa encounter site ang duha ka M16 rifle, .45 calibre pistol kag mga subversive documents.
Nagapadayon ang clearing kag pursuit operation sang Philippine Army sa lugar. Nagpasalig si MGen Marion Sison, commander sang 3rd Infantry Division, nga buligan nila ang nasamaran nga soldado pati na ang pamilya sang napatay nga soldado.