Posible nga na-tripan lang sa dalan ukon road rage ang natabo amo kun ngaa gintiro ang katapo sang 79th Infantry Battalion sa Brgy. Palampas, San Carlos City sang Lunes.
Ang biktima amo si Staff Sergeant Alfort Tito, samtang ang duha ka suspetsado amo sanday Jobert Gimarangan kag Alfie Raganas.
Ang mga suspek nakuhaan pa sang masobra sa isa ka milyon ka pesos nga balor sang suspected shabu.
Suno kay Civil Military Operations Officer 79th IB, Lt. Dan Carlo Samoza, base sa nakuha nila nga impormasyon, nag-overtake ang biktima sakay sa iya motor sa mga suspek nga naka motor man kag posible gin kaakig ini sang mga suspetsado.
Gintuparan nila ang motorsiklo sang biktima kag gintiro siya.
Sa pihak sang madamo nga igo sang bala sa lawas sang biktima, yara na siya karon sa estable nga kondisyon.
Suno sa PNP, gina lantaw pa nila ang kaangtanan sang duha sa drug group.
Pasakaan sila sang kaso nga iligal nga paghupot sang armas, iligal nga paghupot sang iligal nga droga kag frustrated murder.