7.9 million pesos nga balor sang solar powered irrigation system sa isa ka kooperatiba sa Barangay Carabalan sa Himamaylan City ang naga operate na.
Ini ang ginbisita ni Negros Occidental Governor Eugenio Jose Lacson para ma inspect man ang operation.
Ang amo nga proyekto ang gin-turn over sang probinsya sa Tara Agrarian Reform Cooperative sini man lamang nga bulan.
Tuyo sang proyekto nga mahatagan ang mga mangunguma sang maayo kag masaligan kasubong man sustainable nga irrigation solution.
Paagi man sa proyekto mabuhinan ang dependency ukon pag salig sa grid electricity kag fossil fuel.
Naga operate ini paagi sa 168 ka polycrystalline solar panel nga tigayon maka generate sang 57 kilowatts. Sarang ini makahatag sang irigasyon sa tubtob 24 ka ektariya sang ila nga mga gina uma nga kadutaan.
Ang irrigation system may yara sang inverter, may yara man sang irrigation pump kag solar panels para maka tigayon kuha sang init sang adlaw kag ma convert ini sa kuryente.