Sa mga interesado nga mag shift sa renewable energy, labi na sa solar energy, ini na ang higayon nga masabat ang inyo nga mga pamangkot.
Kay man, isa sa luyag nga tutukan sa Renewable Energy Week Expo nga gina pamunuan sang Negros Occidental sini nga semana amo ang “Solar 101”, kag consumer protection.
Gina paabot ang pagtililipon sang mga Provincial, City kag Municipal officials, mga national government agencies sa pag panguna sang Department of Energy, mga renewable energy developers, technology providers, investors, financial institutions, community leaders, kag energy consumers sa Renewable Week Expo nga maga sugod sa May 7 tubtob 9 sa SMX Convention Center sa Bacolod.
Diin gid bala dapat maga sugod kun gusto mo mag transition sa solar power, ano bala ang mga requirements, ang electrical safety nga dapat hatagan sang konsiderasyon kag ano ayhan ang financing nga available para sa mga interesado, ini ang pila sa talakayon nga mga topiko suno kay Rafael “Lito” Coscolluela, Provincial Consultant on Energy and Environment.
Gusto man nila nga ma plastar ang safeguards sa mga consumers kaangay sang pag pa gwa sang listahan sang mga accredited companies sa pag install sini.
Sa pihak nga bahin, isa man sa iga lunsar sa amo nga Expo ang REcreate Negros. Sa idalom diri ang mga komunidad nga wala sang access sa energization program ang may kahigayunan nga mahatagan sang kuryente gamit ang renewable energy.
Ang savings gikan sa pag transition sang gobyerno probinsyal sa solar energy amo ang gamiton para mabuligan ang mga komunidad nga tubtob sa karon wala sang enerhiya.
Suno kay Joshua Villalobos ang Sec Gen sang NICE ukon Negrosanon Initiative for Climate and the Environment nga partner sa amo nga Expo gina usisa ang komunidad kun ano ang ila nga kinahanglanon nga amo ang gina basehan sa programa para sa ila.
[sibwp_form id=1]