Narekober sang kapulisan ang pila ka reams sang gin-alegar smuggled nga sigarilyo sa higad sang dalan sa Hacienda Casal-agan Dako, Barangay DSB sa banwa sang Pontevedra, Negros Occidental.
Ginbilin sang wala pa makilal-an nga mga persona sa higad sang dalan ang mga reams sang sigarilyo nga nakasulod sa puti nga plastic.
Lunes sang gab-i, nakabaton sang impormasyon ang Pontevedra PNP halin sa confidential agent nga may gin-abandona nga mga smuggled cigarettes sa nasambit nga lugar.
Pila sa mga recoveries amo ang apat ka dalagko nga plastic sacks, ang kada isa may unod nga 40 ka reams sang sigarilyo kag isa ka master case sang isa pa ka klase sang sigarilyo nga wala sang dokumento.
Ginabulubanta P100,000 ang presyo sang narekober nga mga sigarilyo.*