Wala labot sanag hugot nga monitoring sa mga puerto sa probinsya, tutukan man sa monitoring ang mga slaugterhouse, mga merkado kag auction market.
Ini suno kay Dr Placeda Lemana, ang provincial Veterinarian nga kaina nagsapol sa katapo sang AHRANO ukon ang Alliance of Hog Raisers Association of Negros Occidental kasunod sang pag lift sang Bacolod sang pork ban.
Suno kay Lemana, gintakalay nila ang mga concerns angut sa gin pa gwa nga Executive Order ni Governor Eugenio Jose Lacson labi na ang bahin sa pagpasulod sang processed pork products kag transshipment sang imported pork, bagay nga suno kay Lemana iya ginpaathag sa ila nga may mga upod ini nga rekisitos.
Ginsiling ni Lemana, nga luyag sang grupo nga mapangapinan ang industriya labi na naga padayon ang sentinelling kag gusto nila nga mangin tayuyon ini tubtob sa recovery.
Maga sapol pa ang Provincial Vet sa mga partners sini nga technicians, veterinarians kag agriculturist sang tagsa ka LGU para sa ila pa gid dugang nga mga tikang.
“Ipatawag namon ang aton partners sa LGUs like agriculturist, technicians and ang mga city veterinarians, kun ano gid ang mahapos nga indi kami masyado mabudlayan. But for the meantime, ang amon gina obra is that ma monitor kami sa slaughterhouses, sa auction markets, sa mga markets naton ni kun may gabaligya bala sang pork products nga halin sa mga prohibited naton nga mga areas”, suno kay Lemana.
Pero sa karon ang bantayan nila ang raw nga processed food nga in volume kaangay sang chorizo, tocino kasubong man ang buhi nga baboy nga kun indi sigurado ang ginhalinan sarang makadala sang halit.
Natalana man ang pagsapol nila sa Bacolod LGU.