Masobra P700,000 nga balor sang ginasuspetsuhan shabu ang nakuha sang Police Station 2 sa gindakop nga Sangguniang Kabataan Kagawad kag duha ka mga teenagers sa ginpatigayon nga buy-bust operation sa Purok Sigay, Barangay 2 sa Bacolod City, kaina sang kaagahon.
Ginkilala ang mga gindakop nga sanday alyas “Joven”, 23-anyos, isa ka elected SK Kagawad sang Barangay 12; alyas “Jessie”, 19-anyos, residente sang Brgy. 10; kag alyas “John”, 18-anyos, taga Brgy. 9.
Nakuha sa ila ang P1,000 nga buy-bust money, siyam ka panid sang boodle money, kag 16 ka pakete sang suspected shabu.
Ginsiling ni Police Major Eugene Tolentino, hepe sang Bacolod Station 2, mag-barkadahay ang tatlo ka mga gindakup kag ang subject sang buy-bust amo ang SK Kagawad.
Suno kay Tolentino nga base sa ila monitoring, humalin 2024, nagagwa na ang ngalan sang SK Kagawad, nga isa sa mga nagaduso sang iligal nga droga sa lugar.
Ginahulat sang kapulisan ang resulta gikan sa crime laboratory antes ipasaka ang kaso nga pagsupak sang Republic Act 9165 ukon Comprehensive Dangerous Drugs Act of 2002 batok sa mga gindakop.*