Pagsugod sang bag-ong tuig nagsugod naman ang gintukod nga Vaccination Council sang siudad sang Bacolod sa profiling sang mga pumuluyo nga unahon nga hatagan sang bakuna kontra COVID-19.
Suno sa executive director sang Bacolod Emergency Operations Center nga si Em Ang nga kabahin man sang Vaccination Council, ginsuguran na ang profiling bisan wala pa sang pat-od ang petsa kun san-o mangin available ang bakuna sa siudad.
Ini agud kun mag-abot na ang vaccine, madasig kag masulhay na ang pagdapat sini sa mga na-identify na nga mga pumuluyo.
“Ang profiling is pag determine kun sino na sila ang i-immunize and ano ang pag prioritize, for example, ang top priority would be the medical frontliners, ang mga health care frontliners naton sa health care facilities nga naga attend gid ya sa mga COVID patients,” suno kay Ang.
Ginsuguran naman ang pagpanghanda sang mga health centers sa Bacolod nga pagahimuon nga vaccination centers.
Suno kay Ang, importante nga maplastar na kun diin nga mga lugar patigayunon ang vaccination bangud may mga requirements sa pag store sang bakuna agud nga indi maapektuhan ang efficacy sini.
“The health centers nga may ara sang eskwelahan kay gamtion ta ang gym kay kinanlan indi na mapatenir dugay ang vaccine kinanlan dasigay so simultaneous so imagina kung mag immunize lang kita 200,000,” suno kay Ang.
Bilang presidente sang League of Cities of the Philippines nagapakig-angut naman si Bacolod Mayor Evelio Leonardia sa national government para masiguro nga madasig nga makalab-ot sa mga siudad ang bakuna.
Samtang ginpahayag naman ni Provincial Consultatnt of Economic Affairs nga si Albee Benitez nga mahimo sa madasun nga bulan makalab-ot na ang bakuna sa probinsya.
Siya ang nagapakig-angut man sa kay Secretary Carlito Galvez Jr nga amo ang vaccine czar sang pungsod kun paano makakuha sang bakuna ang Negros Occidental.
Lolo nga ma attend lang kun tani sang misa sakay sa balsa, nalumos
Patay na sang masapwan sang mga residente ang 74 anyos nga si Ludovico Duay sa kilid sang baybay sa Barangay Old Sagay sa Sagay City kahapon sang aga.
Sandig sa imbestigasyon sang Sagay PNP, ulihu nga nakita si Duay sang Sabado nga nagatabok sa Himoga-an River sakay sang balsa para kun tani mag tambong sa misa.
Pero bangud sang mabaskog nga current sang tubig, suno sa pulis naanod kag nahulog sa iya balsa ang biktima nga mahimo gintunaan sang iya pag kalumos.
Sa kilid na sang baybay sa Barangay Old Sagay nasapwan ang iya bangkay pagkaligad sang duha ka adlaw.