Nagalaum si Negros Occidental Governor Eugenio Jose Lacson nga sa mas madali nga panahon tigayon nga mapat-od kag madakpan ang nabilin nga mga suspek sa pagpatay kay Governor Roel Degamo sang Negros Oriental.
Sang weekend ginatos ka mga tropa gikan sa Armed Forces of the Philippines kag Philippine National police ang gin-deploy sa nagkalain-lain nga bahin sang Negros Oriental para mag patigayon sang security checkpoints.
Isa ka Joint Task Force ang gin-activate kag naga tutok karon para tigayon ma punggan ang kalakasan sa isla sang Negros kasunod sang pag patay kay Degamo.
Kalakip sa gin-deploy ang composite soldiers gikan sa anum ka Army battalions nga maga pamuno sa 21 ka joint AFP-PNP checkpoints sang Domingo sa Third District sang Negros Oriental bilang panugod.
Suno kay Lacson, ang kasubong nga mga sitwasyon ang indi maayo sa turismo. Ang mga dumuluong indi makahangop sini kasubong sa mga Pilipino.
Gani sa mas temprano nga makit-an ang mga suspek mas mangin maayo, labi na sa patag sang turismo. Indi man masiling nga may shift sa preference sang mga turista gikan sa Negros Oriental padulong sa Occidental, pero handa ang Negros Occidental para diri.