Tigayon na nga nakakuha ang probinsiya sang RONO ukon Resolution of No Objection sa mga natungdan nga LGU para sa bulk water project sini magluwas na lamang sa Silay City.
Suno kay Provincial Administrator Rayfrando Diaz, humalin sa Manapla, Victorias City, EB Magalona, Talisay kag Bacolod may RONO na nga nakuha ang probinsya para sa 1.2billion pesos nga bulk water project. Suno kay Diaz siya ang direkta nga naga pakig-angut sa City Mayor’s Office sang Silay may kaangtanan sa documentary requirements. Ang kinahanglanon na lang nila ang RONO nga ang naga issue konseho. Kahapon may duha ka konsehal sang Silay nga nagasapol sa iya. Naga panindugan ang Silay SP nga ang probinsya ang maga kuha sang supply sang tubig gikan sa suba sakop sang Silay. Suno kay Diaz ang tubig ang wala ginapanag-iyahan sang isa ka LGU. Gina govern ini sang National Government. Dugang pa niya ang paga gamiton nga tubig para sa bulk water project ang unsubscribed ukon ang yadtong available lamang nga tubig base man sa pagtugot sang National Water Resources Board. Isa sa mga intake sites kag water treatment sites sa proposed bulk water project yara sa Guimbalaon sa Silay kag ang isa sa Malogo sa EB Magalona. Ang problema indi technical suno kay Diaz kundi may tatlo ka mga faction nga indi maka hilisugot sa paghatag sang RONO. Kuntani ang tubig suno sa iya wala na nasakop sa pulitika.
“Ang akon ya nga point is water should be above politics. It is a basic need and a basic right of every Silaynon, of every Negrosanon. And all of us should be one in supporting our bulk water project. Indi nila ma aprobahan sa Sanggunian ang RONO. Amo na man lang na”, suno kay Diaz.
Samtang, ang Aboitiz Group nga isa sa onse ka interesado nga bidder ang nag back out suno kay Diaz. Sa June 27 natalana ang bidding para sa bulk water project. May naga ayo nga paisulon ang petsa suno kay Diaz. Ini ang gina tun-an pa sang gobyerno probinsyal.