Silay City Mayor Joedith Gallego ang nagapanawagan sa may ihibalo ukon saksi sa natabo nga pag lampos bato sa mag-utod nga mga menor de edad sa Brgy E. Lopez sa Silay City kun sa diin isa ang nagtaliwan.
Suno kay Gallego padayon ang pag panawagan para sa saksi. Ini man gani ang rason nga nagtanyag sang reward money nga nagdangat na sa P100,000, para mapadasig ang paglubad sang kaso kag mahatagan sang hustisya ang natabo sa mag pamilya.
Nagapabilin nga kritikal ang 14 anyos nga dalagita nga na operahan na matapos nga mag agum sang malubha nga mga pilas sa iya nga ulo.
Ang 4 naman ka tuig nga bata nga lalaki ang conscious na suno sa alkalde.
Iya nga gina tugyan sa pulis ang padayon nga pag pangusisa sa kaso.
Amat-amat naman ang pag-abot sang bulig pinansyal para sa pamilya.
May naghatag na gikan sa luwas sang pungsod sang P60,000 nga bulig sa iloy sang mga kabataan suno kay Gallego. Ang iloy nga isa ka OFW ang nagpauli balik sa pungsod matapos mapahibalo sa natabo sa tatlo niya ka mga kabataan.
Gin-report nga nadiskubrehan na lamang sang amay nga isa ka enkargado sa iya nga pag abot sa ila nga balay sang Sabado nga pilason na ang iya kabataan sa sulod sang ila nga kwarto.
Ang 9 anyos nga bata nga babaye ang wala nakaluwas kag ini ang nagtaliwan.
“Subong wala pa gid. Amo na ang pinaka ano gid subong nga may mag tindog nga witness. Supposed to be makadto di siya sa akon subong kay may nag donate, naghatag nga halin sa abroad P60,000 te wala niya pa makwa sa opisina. Ara subong sa ospital nagabantay sa bata ya na na ICU”, suno kay Gallego.*
[sibwp_form id=1]