Mga pumuluyo sang Silay ang indi pabor sa tuyo nga pagkuha sang tubig gikan sa suba sa Silay, ilabi na ang sa Imbang, para sa bulk water project sang probinsya.
Ini suno kay Silay City Mayor Joedith Gallego rason nga amo man ang iya nga panindugan.
Pero may ginaduso si Gallego nga tigaylo sa Imbang pwede matigayon ang pagkuha sang tubig para sa amo nga proyekto sa Malogo River, pero sa ubos lang para indi man ma apektuhan ang irigasyon sang NIA.
Suno kay Gallego sa karon may pagnubo sa lebel sang tubig sa Imbang rason nga ginakabalak-an ang mangin epekto sang bulk water project sa amo nga source man sang tubig.
Diri man suno sa iya nagakuha para sa irigasyon ang mga Silaynon.
Tubtob sa karon wala pa maka issue ang Silay SP sang Resolution of No Objection para sa bulk water project.
“Ang sa SP ya may tindog man na sila. Pero sa akon ya nga panan-awan amo man na. Ang sa Imbang River ya kun ako ya kay gin ano ko man ni sa mga pumuluyo man, ang mga pumuluyo naga against gid. Te amo man na ang akon tindog. Ang sa Malogo may option dira basta sa ubos lang sang irrigation ka NIA”, suno kay Gallego.
Paathag ni Atty Jessa Genteroles ang focal person para sa Public, Private Partnership Projects sang Negros Occidental, damlag nakakuha na ang probinsya sang certificate of water availability gikan sa National Water Resources Board.
Naga kasayuran nga may yara sang nagakaigo nga supply sang tubig para sa bulk water project kag wala nabutang sa kumpromiso ang mismo ginakuha na nga daan nga supply sang siudad sang Silay gikan sa amo nga mga suba.
Suno kay Genteroles ang Imbang may 34 tubtob 36 MLD ukon million liters per day nga available kag 100 MLD naman sa Malogo. Ang Bulk water project naga kinahanglan sang 34.5 MLD.
Sa June 27 na ang bidding para sa proyekto.
Suno kay Genteroles sa legal nga aspeto sarang madayon ang proyekto bisan wala sang RONO nga mahatag ang Silay.
Ginahikot nila ang RONO agudto politically mangin sulhay ang dalagan sang proyekto.