Matapos nga ginticketan sang mga pulis bangud sang ilegal parking nag singgitan ang ini nga negosyante sa may dalan Luzuriaga kaina sang aga.
Ginsaway siya sang mga traffic enforcer nga indi na pwede maka parking sa amo nga bahin sang dalan kag pag ariya na lang sang mga karga kag produkto ang pwede diri sumugod sang Lunes pero naakig siya.
Suno sa enforcer wala sang excused sa road clearing operation nila. Negosyante man ukon jeepney driver.
Humalin sang Lunes gina hawanan na sang City Legal Office Enforcement Team ang downtown sang Bacolod.
Naga balik balik lang ang iban sa pwesto. Kada may mag abot nga taga City Legal naga pinalumba sila sa pag dinalagan.
Suno sa mga vendors naga apela sila sa siudad nga kun tani matagaan sila sang bisan gamay lang nga pwesto sa sidewalk bangud wala sila sang customer kun didto sila sa Vendor’s Plaza sa Reclamation Area.
Si Nena, duha na ka dekada nga naga baligya sang mga ponda diri. Indi siya luyag mag saylo didto kay suno sa iya wala gid siya inugbakal sang bugas kun didto siya mag tinir. Dugang pa niya wala pa sang kasilyas sa Vendor’s Plaza kag wala sang bumalakal.
Si Jaima, naman may gina gatas pa nga napulo ka bulan nga lapsag. Wala sila kuno sang benta kun didto sila. Kapoy na sila sang lagsanay sa taga City Legal kada aga humalin pa sang Lunes.
Ginkadtuan sang Digicast Negros ang Vendor’s Plaza agud lantawon ang sitwasyon…. May mga vendors man didto nga padayon sa pag negosyo.
May mga gina bulad nga karaho sa gwa. Sa sulod, may mga naga katulog nga mga tawo sa mga tiles nga lamesa.
May isa pa ka grupo sang mga kabataan nga naga hinampang nga wala sang mga mask.
Suno sa mga negosyante didto problemado gid man ang kasilyas nila pero may mga suki sila nga naga padulong didto para mag pangompra.
Kabahin sang nationwide clearing operation ang ginahimo sang siudad kun sa diin ginmando sang dilg nga dapat hawanan ang tanan nga sidewalk kag dalanon. Kun indi ini mahimo sang mga barangay kag LGU, mahimo sila kasuhan sang DILG.