Ginpapanaugan sang Show Order si Nenette Escarda nga Cashier 1 kag sadto anay nagserbe nga acting treasurer sang Isabela.
Ang Show Cause Order nga iya nabaton sini nga adlaw ang gin-issue ni Provincial Administrator Rayfrando Diaz.
Gina pangayuan paathag si Escarda kun ngaa gindala niya sa iya nga balay ang 2.6 million pesos cash kasubong man mga tseke nga naga balor sang 3.8 million pesos nga naga serbe nga pondo sang banwa, nga wala man sang authority nga ginhatag sa iya ang alkalde sang Isabela, Mayor Irene Montilla, ukon ang National Government.
Ika duha gina pasabat siya sa pagkadula sang amo nga pondo samtang yara ini sa iya unauthorized possession.
Damlag pa gin-report ni Escarda nga ini ang ginkawat sa iya nga balay sa Bacolod City.
Ikatlo, base sa cash examination sang Commission on Audit nga napetsahan Januray 31, 2023, may 6.6 million pesos nga collection sang banwa base sa cashbook sini as of January 20, 2023, ang wala na deposit. Ang cash advances nga 972,000 pesos naga pabilin naman nga unliquidated as of cut-off time.
Gina pangayuan siya paathag kun ngaa indi sya pagpasakaan sang kaso kriminal ukon administratibo.
Sa karon balik si Escarda sa daan nga assignment niya sa Provincial Treasurer’s Office.
Pending sang imbestigasyon nga gina patigayon, gina paiway sa iya nga assignment subong ang pag-uyat sang kwarta.
Suno kay Diaz nakibot man siya sang natabo.
Disappointing kag frustrating kag naga lain man ang buot ni Diaz, labi na sa tunga sang gina himo nga pagtatap sang probinsya sa mga empleyado sini paagi sa mga ginahatag nga benepisyo.
Suno kay Diaz, sa iya nga pagsugilanon kay Escarda sang nag ligad nga semana, nag pangayo ini sang pasaylo kag nag pahayag nga wala niya nahilabtan ang kwarta.