Shearline kag trough sang Bagyo Paeng ang nagdala sang mabunok nga ulan sa probinsya kag nagtuga sang pag baha sa pila ka bahin sini.
Sa San Carlos City, sa kuha ni Kenth Alfred kahapon, makit-an ang pagbaha sa pila ka mga dalanon sang siudad nga naga lakip sang lugar nga napahamtang sang solar power plant.
Sa report sang Provincial Disaster Management Program Division, may 524 ka mga persona ang apektado sang pagbaha sa lima ka mga barang sa San Carlos City. May tig-isa man ka barangay nga apektado sang pagbaha sa Moises Padilla, Calatrava kag Sipalay City suno sa PDMP. Sa October 26 nga report sang PDMPD, 719 ka pumuluyo ang apektado sang baha.
Mas nagbaskog si Paeng kag karon ini ang nangin tropical storm. Sa 10 am nga bulletin sang Pag-Asa, ang sentro ni Paeng ang yara sa East sang Borongan City Eastern Samar.
May maximum sustained winds ini nga 65 km/hour malapit sa sentro kag pag madlos nga tubtob sa 80 km/h. Sa Visayas, ang Eastern Samar, Northern Samar kag Samar ang yara sa idalom sang Tropical Cyclone Wind Signal No. 1. Naga abiso ang PDMPD sa publiko nga mag aligmat, bangud bisan indi man direkta nga apektado sang bagyo ang probinsya possible sa gihapon ang pagtupa sang mabunok nga ulan. May 16 ka mga LGU sa probinsya ang nag suspend sang klase subong nga adlaw.