Gintiro sang duha ka mga suspek ang 73-anyos nga lalaki sa Sitio Talave, Barangay Punao sa San Carlos City sadtong Lunes.
Ginkilala ang biktima nga si alyas “Cresencio”.
Base sa imbestigasyon sang San Carlos PNP, nanaug sa jeep halin sa Calatrava ang biktima kag nagpungko sa kilid sang sementado nga dalan.
Gintiro sang duha ka suspek ang biktima kag nalagyo sakay sa itom nga motor padulong sa direksyon sang Calatrava.
Nakaangkon ang biktima sang tiro sang bala sa iya lawas kag nawong.
Narekober sa crime scene ang isa ka slug sang wala pa mahibaluan nga kalibre sang pusil.
Suno sa pulis, nagakadto ang biktima sa San Carlos agud manguha sang dahon ka Anahaw nga ginahimo niya sang dekorasyon, bangud ini ang iya palangabuhi-an.
Sa follow-up operation, nakilal-an kag nadakpan ang duha ka mga suspek sa Calatrava. Isa sa ila, kaugalingon nga anak sang biktima.
Ginsiling ni Police Capt. Rodney Sarona, personal nga dumot ang ginalantaw nga motibo sa insidente bangud masami nga naga-inaway ang mag-amay. Ang bata nga suspek ang may gin-upod nga isa pa gid ka persona nga amo ang nagtiro sa iya amay.
Kagapon, napasaka na sa Prosecutor’s Office ang kaso nga parricide batuk sa bata, samtang murder naman ang sa iya upod.
Detained karon ang duha sa San Carlos PNP.*