Nagpatigayon sang random inspection ang mga katapo sang Negros Electric and Power Corporation kag ila naaktuhan ang 63-anyos nga lalaki nga nagakuti sang iya kuntador sa Jesusa Heights Subdivision, Barangay Estefania sa syudad sang Bacolod, Miyekules sang aga.
Gin-deny naman sang tigulang nga intensyon niya nga i-tamper ang kuntador bangud suno sa iya, ginhikap niya lamang ini agud lantawon kun may tubig nga natipon sa sulod.
Magapangatubang ang senior citizen, nga gindala sa Police Station 4, sang kaso may angut sa Republic Act 7832 ukon Anti Electricity Pilferage Act kag Illegal Use of Electricity.
Suno sa NEPC security apprehension team, daku ang balay sang nadakpan nga tigulang kag ang kuntador sini ang yara sa sulod sang iya property.
Gindugang pa sang apprehension team nga indi sila mag-untat sa pag-operate, gani sila nagapangabay sa mga iligal nga naga-manipular sang kuntador nga mag-untat na kay kun madakpan sila, priso kag kaso ang ila paga-atubangon.
Nagahinyo man ang NEPC sa publiko nga mag-report sa ila kun may nahibaluan nga mga persona nga iligal nga nagagamit sang kuryente.