Yara sa gwa sang iya puluy-an ang 62-anyos nga lalaki sang gintiro sang suspek nga iya man lang kaingod balay sa Abada Escay, Barangay Vista Alegre sa Bacolod, Sabado sang gab-i.
Suno sa suspek nga ginkilala kay Roberto Ramos,nasal-an niya nga aswang ang biktima nga si alyas Rudy.
Naigo sang bala si Rudy sa iya dughan kag gindala sa ospital. Narekober sa crime scene ang duha ka basiyo sang caliber .45 pistol.
Suno kay Police Captain Dax Santillan, hepe sang Bacolod Station 7, yara na sa estable nga kondisyon ang biktima.
Nadakpan sa pursuit operation si Ramos kag sang ginrikisa, nakuha sa iya ang apat ka sachets sang ginasuspetsuhan shabu nga nagabalor P81,600 kag isa ka caliber .45 pistol nga may magazine kag isa ka bala.
Ginsiling ni Santillan nga si Ramos ang may kaso nga frustrated murder apang naka-piyansa siya. Ang suspek ang yara sa drugs watchlist sang kapulisan kag gina alegar nga isa ka drug addict.
Magapangatubang ang suspek sang bag-o nga kaso nga frustrated murder, paglapas sa Comprehensive Dangerous Drugs Act of 2002 kag Comprehensive Firearms and Ammunition Regulation Act.