Senator Grace Poe nagsiling nga indi tanan nga empleyado sang CENECO ang automatic nga makabalik serbisyo sa idalom sang mangin panibag-o nga franchise. Labor union sang Ceneco nag-file sang notice of strike sa kabalaka nga mawad-an sila sang ubra sa tion nga magtake-over na ang Negros Electric and Power Corporation.
Indi tanan nga mga empleyado sang CENECO ang automatic nga ma-absorb ukon makabalik trabaho sa idalom sang Joint Venture Agreement sang distribution utility kag Primelectric Holdings Incoporated.
Ini ang nangin panindugan ni Senator Grace Poe nga nagpamuno sa Senate hearing sang Committee on Public Services angut sa franchise application sang Negros Electric And Power Corporation ukon NEPC nga karon bunga sang JVA.
Ini matapos ginpalab-ot ni Leonard Guilaran katapo sang Responsible Supervising and Confidential Union of Rational Employees upod sa tiglawas sang grupo sang Anti JVA Coalition ang kabalaka sa tion nga mag take-over na ang NEPC sa franchise areas sang Ceneco.
Kahapon liwat nga nag-file sang notice of strike ang katapo sang Ceneco Union of Rational Employees sa National Conciliation and Mediation Board bangud sang kahangawa nga madula ang kasugtanan angut sa ila security of tenure.