Gina abi-abi kag gina pasalamatan ni Victorias City Mayor Javier Miguel Benitez ang endorsement sa iya ni TESDA Director General Franciso Benitez kag sang mga opisyales sang third district para sa congressional seat sang distrito.
Pero suno sa alkalde wala pa siya sa karon sang desisyon kag padayon pa ang konsultasyon.
Sa press conference kahapon ginsiling ni anay third district congressman Benitez nga luyag niya i-endorse si Mayor Javi nga mag papili bilang congressman sa distrito sa 2025.
Suno sa iya kampante siya nga mag biya sa distrito kay Mayor Javi base sa track record sini lakip na ang iya nga passion kag drive.
Si EB Magalona Mayor Marvin Malacon kag ang ila nga Sangguniang Bayan ang naga endorse man kay Benitez.
Amo man si Murcia Mayor Gerry Rojas nga nagsiling ang mga opisyales sang iya banwa ang maga endorse kay Benitez.
Gin siling sang alkalde nga antes magtakop ang bulan sang Setyembre may desisyon na siya bahin diri.
Mabudlay suno sa iya ang desisyon labi na nga ang iya tagipusuon yara sa Victorias kag nag invest na siya sang iya nga tion sa siudad para ma develop ini.
Nabakante ang congressional seat sang third district karon kasunod sang appointment ni Kiko Benitez bilang TESDA Director General.
Samtang, iya na nga gin-request ang pag pungko ni Abang Lingkod Partylist Representative Stephen Paduano bilang caretaker sang distrito.