Padayon ang pagpangita sang Coast Guard kag rescue team sang Hinoba-an sa retired pulis nga na-anod sakay sa iya nga pick-up bangud sang tubig baha.
Suno kay Hinoba-an Mayor Ernesto Estrao, as of press time ang search and rescue operation ang nagapadayon para kay retired police Daky Dacoscos.
Kahapon na-rescue ang iya nga asawa nga iya kaupod sa pick-up sang magtabok sila sa highway sa Brgy Bulwangan.
Suno sa mayor, nagdumdom ang rescue team nga ang isa ka lalaki nga ila na-rescue kahapon amo na si Dacoscos. Pero amo gali yadto ang mananagat nga ginkilala nga si Edmond Villaruz nga na-anod man sa tubig baha.
Sa pito nga gin-report na missing bangud sang Bagyo Dante sa Hinoba-an si Daky Dacoscos na lamang ang padayon nga gina pangita suno sa alkalde.
“Dira man sa na anudan ni Mr and Mrs Dacoscos amo man to nga baha. Kay ang balay sadto ni Edmond dira man sa tupad sang nabahaan. Daw ginbalik ya guro ang balay ya,” suno kay Estrao.