Gindakup sang kapulisan ang admin staff sang isa ka eskwelahan matapos gin-alegar makuhaan sang ginasuspetsuhan shabu sa ginpatigayon nga buy-bust sa Barangay Punta-Taytay, Bacolod City Miyerkules sang kaagahon.
Kapin 50 gramos ukon P340,000 nga balor sang suspected shabu ang nakumpiskar sa 34-anyos nga si alyas “Cha”.
Samtang, sa separado nga buy-bust, isa ka 30-anyos nga babaye ang arestado sang kapulisan sa Barangay Mansilingan.
Ang gin-aresto nga si alyas “Jepay” ang nakaagi na dakup bangud sa iligal nga droga kag naka-avail lamang sang plea bargaining agreement, rason nga nakagwa siya sa prisohan.
Ugaling, balik detention cell naman siya matapos liwat nga madakpan kag nakuhaan sang walo ka pakete sang ginasuspetsuhan shabu nga may balor P204,000.
Detained ang duha ka mga babaye kag magapangatubang sang kaso angut sa pagduso sang iligal nga droga.
