Ginkumpirmar ni Bacolod City Administrator Atty. Mark Mayo nga nangin job order worker sang syudad ang babaye nga nadakpan sa buy-bust operation sa Punta-Taytay sumugod Marso 2025 tubtob Hunyo 2025 lamang.
Nakuhaan sang kapin 50 gramos ukon P340,000 nga balor sang suspected shabu ang 34-anyos nga subject, nga naga-obra bilang school admin staff sa isa ka buluthuan sa Bacolod, Miyerkules nga adlaw.
Suno kay Mayo, sini nga July 2025, gin-endorse for retention bilang job order worker ang nasambit nga babaye bangud sadto nga tion, wala pa man sang may nabaton nga mga reklamo batok sa iya.
Apang bangud sang natabo, wala na sang plano pa ang syudad nga batunon ang nasambit nga anay job order worker.
Ini nga mga insidente ang isa sa mga rason, suno kay Mayo, nga nagapanawagan ang alkalde sang Bacolod nga si Mayor Greg Gasataya sa mga job order applicants nga luyag mag-obra sa syudad, nga dapat wala sila sang involvement sa ano man nga aktibidades angut sa iligal nga droga.
Magluwas sa mga ginapatigayon nga validation kag background checking, gina-haylo suno kay Mayo nga magpa-drug test ang mga aplikante sang syudad.
