Schedule para sa outdoor games sa Western Visayas Regional Athletics Association Meet ang gin-idog para mapangapinan ang mga humalampang sa epekto sang mainit nga panahon.
Suno kay Ian Arnold Arnaez ang spokesperson sang DepEd – Negros Occidental Division nakasugtan nga ang mga outdoor games ibutang las 6 sang aga tubtob las 9 sang aga, kag las 5 sang hapon tubtob las 9 sang gab-i. Suno kay Arnaez, kaangay sang ginpatigayon ang Provincial Meet nga tuman man ang pag biti sang init, ang bag-o nga schedule ang naga tuyo nga mapangapinan ang tanan nga maga pakig bahin sa outdoor games.
“So in between (9am to 5pm) waay gid outdoors (games). Wala gid man problema ang indoors especially ang ara sa mga aircon nga venues kay mabugnaw”, suno kay Arnaez.
Wala naman sang problema sa schedule sang indoor games. Sa May 2, las 5:30 sang hapon naka schedule ang opening sang WVRAA nga gina host sang Negros Occidental kag Bacolod Division. Dugang pa ni Arnaez, naplasta na ang tanan, lakip na ang pag pasiguro nga may nagakaigo nga supply sang tubig sa billeting areas kasubong man sa mga venue. May mga 5,000 delegates, coaches, assistant coaches kag chaperone ang ginapaabot sa May 2 to 7 nga hinampang.