Pila sa mga local government Units ang nagsugod na hikot para makahatag sang assistance sa mga hog farmers nga na apektuhan bangud sang pig deaths.
Suno kay Mayor Jilson Tubillara, gikan sa ila nga Livelihood assistance fund, maga kuha sila sang pondo para sa mga hog farmers nga napatyan sang baboy.
Damlag pa nag deklarar sang state of calamity ang Sangguniang Bayan pero wala ini nag sunod sa nagakaigo nga procedure suno kay Tubillara, gani indi sila makagamit sang pondo gikan sa calamity fund.
Kahapon ang deadline sang pag pang lista sa mga hog farmers nga apektado kag mga 500 tutob 600 ka hog raisers ang tigayon naka palista.
Suno sa alkalde sa isa tubtob apat ka baboy nga napatay sarang makabaton sang 3,000 pesos ang hog raiser kag sa lima ka baboy pasaka, 5,000 pesos.
Ang Veterinary Office kag Agriculture Office ang naga double check sang gina report sang mga hog farmers.
“Together with the vice mayor, ato man to ang vice mayor, duha ka councilor nag-decide nga sa baboy napatay, kuhaan lang siya namon sa amon livelihood program.
So, ang napatyan 1 to 4, tagaan namon 3,000 pesos ang five heads above tagaan namon 5,000 pesos. So kagapon lang kami nag cut-off date sa reporting sang baboy”, suno kay Tubillara.
Sa Bago City naman, suno kay Mayor Nicholas Yulo maga sapol pa sa madason nga semana ang DRRMO kag Sangguniang Panlungsod para sa kantidad nga ihatag.
Mahimo nga humalin sa 1,000 tubtob sa 2,000 ang mabaton sang hog farmer sa kada baboy nga napatay.
“Between 1,000 to 2,000 pesos guro per head. We started about three weeks ago nga kun may hog cholera death ka, may form ka nga gina fill upon, kag i-submit sa amon nga vet”, suno kay Yulo.
Nagapanawagan naman si Yulo sa hog farmers nga dapat magsunod sang nagakaigo nga tikang sa paglubong sang napatay nga mga baboy bangud may mga report siya nabaton nga iban ang gina haboy lang sa mga suba, rason nga madasig ang pag lapta sang masakit.
Nag patuman na sang kampanya ang Bago City angut diri.