Siudad sang San Carlos ang ginpaidalom sa state of health emergency. Ini kasunod sang pagsaka sang amoebiasis cases sa siudad. Suno kay Charlen Pol Anlap, spokesperson sang San Carlos City Hospital, as of February 24, 7am nga report, may 13 ka total emergency room admission. 13 man ang na record nga new cases sang amoebiasis.
Humalin Pebrero 1 to 24 naman, may 119 ka amoeba positive cases kag 86 ang acute gastroenteritis cases. Sa kabilugan 205 ang AGE kag amoebiasis cases sa datus sang ospital.
Sang Miyerkules, may isa ka tatlo ka tuig nga bata nga gindeklarar dead on arrival sa ospital suno kay Anlap.
Napatay sya bangud sang severe dehydration. Indi naman mapat-od kun nag positibo sya sa amoebiasis ukon sa iban pa gid nga bacteria, pero suno kay Anlap nag gikan ang bata sa Barangay Buluangan, ang barangay nga may pinaka mataas nga na record nga kaso sang amoebiasis kag AGE. 31 ang AGE kag amoebiasis cases sang amo nga barangay.
Sa karon suno kay Anlap, padayon ang testing kag monitoring sang mga water sources sa nagkalain-lain nga mga barangay.
Sa ospital mismo ang bottled water lamang ang gina tugutan nga mangin source sang ilimnon sang mga pasyente kag watcher.
“Ginalantaw subong sang LGU ang water source gid. Gina screen, gina pa check karon, kun ano ang content sang water. As of now diri sa hospital ang gina pagamit lang gid namo na water sa mga pasyente kag sa watcher mineral water gid. Bottled water. Bangud pod may mga watchers man pod kami nga na-admit na pod kay tungod ang ila tubig ba na gina padala sa hospital halin pod didto sa ilaha na balay”, suno kay Anlap.
Sa Executive Order nga gin pa gwa ni San Carlos City Mayor Renato Gustilo iya nga gin mando man ang hugot nga coordination sa mga barangay agudto mapamatukan ang paglapta pa gid sang amoebiasis kag paano malikawan ini. Pagpabukal sang tubig, kag matinlo nga gawi ang gina kampanya. Samtang, ginklaro naman ni Anlap nga may nagakaigo pa nga kapasidad ang ospital.