Sang Lunes gin-concur sang Sangguniang Panlungsod sang San Carlos City ang rekomendasyon sang City Disaster Risk Reduction Management Council nga pagpaidalom sa siudad sa State of Calamity bangud sang malapnagon nga kahalitan tuga sang El Nino phenomenon.
Nagdangat sa 17.6 million pesos ang balor sang kahalitan sa pananom nga natuga sang El Nino Phenomenon. 375 ka ektariya sang agricultural land ang gin-report nahalitan. May 518 naman ka mga mangunguma nga ang palangabuhian apektado. Padayon ang pagsapol sang CDRRMO sa mga apektado nga mangunguma suno kay CDRRM Officer, Joe Recalex Alingasa, Jr.
Ang San Carlos City ang ikatlo nga LGU sa probinsya nga nagpaidalom sa state of calamity bangud sang kahalitan sang El Nino Phenomenon. Una nga nag deklarar ang banwa sang San Enrique kag siudad sang Kabankalan sang state of calamity. Sa pinaka ulihi nga datus nga na release sang probinsya may 214 million pesos ang balor sang kahalitan sa pananum sa bilog nga probinsya tungod sang epekto sang El Nino Phenomenon.