Mismo ang iloy ang nagbilin sang buhi nga lapsag nga babayi nga nasapwan sa Hacienda Guanzon, Brgy. Mansilingan, Bacolod City sang kagab-i.
Ini ang suno kay Police Captain Greeky Cayao, commander sang Police Station 7.
Mga las 6:30 sang gab-i sang nasapwan sang mga kabataan nga nagapangkuha damang ang lapsag sa kilid sang dalan may lampin, diaper kag gatas pa.
Matapos gin-report sa police station ang insidente, nagpalapit ang mga ginikanan sang lapsag sa PNP.
Ginsiling sang iloy nga gin-abandonar niya ang iya anak bangud nahadlok siya nga mahibaluan sang iya man nga iloy nga siya ang nagbun-ag sang bata.
Ini na ang ikaduha nga anak nila sang iya nga live-in partner.
Napamatud-an man sang mag live-in partner nga ila ang lapsag bangud mismo ang nagpabata sa iloy ang nagkadto man sa police station.
Suno kay Cayao, sang Martes lang ginbun-ag ang lapsag.
Ang ginikanan sang bata ang residente man mismo sang Hacienda Guanzon.
Sa Celita Village naman sa Brgy. Alijis,isa naman ka patay nga lapsag ang nasapwan.
Suno kay Kagawad Wilfredo Buyco, nasapwan na lamang sang pumuluyo ang nagapanimaho na nga lapsag nga isa ka lalaki sa idalom sang kasagingan sa kilid sang isa ka tiangge.
Sa karon, gina-trace na sang barangay kon sin-o ang mga nagabusong sa lugar nga posible nagbun-ag kag nagbilin sang lapsag sa lugar.