May 121 ka mga Overseas Filipino Workers nga yara sa Israel nga gikan sa Negros Occidental kag Bacolod City.
Pero sa karon wala sang ni isa sa ila ang luyag mag balik sa pungsod.
Sa 121 ka mga OFW sa Israel, base sa datus sang Overseas Workers Welfare Administration, 90 ang gikan sa Negros Occidental kag 31 ang gikan sa Bacolod City.
Suno kay Governor Eugenio Jose Lacson, wala sang ni isa sa ila sa karon ang luyag ukon ang nag signify nga mag pauli sa Pilipinas.
Padayon nga bukas ang help desk sang probinsya sa mga apektado nga OFW sa konplikto sang Israel kag Iran.
Indi lamang bukas ini sa mga OFW sa Israel kundi pati man ang sa Iran kag sa kaiping nga pungsod sang Jordan.
Dugang pa sang gobernador, ang national government ang naga facilitate na sang tanan kag naga bulig sa kinahanglanon sang mga apektado.
Sa idalom sang Alert Level 3 ang mga Filipino sa Israel ang gina haylo nga mag paidalom sa voluntary repatriation.
Gina paabot ang tikang sang Iran kasunod sang pag pang atake sang Estados Unidos sang Domingo sa key Iranian nuclear sites.
As of June 22, sa post sang Philippine Embassy in Israel, may isa ka Pinoy ang yara sa critical condition, isa ang may yara sang moderate to serious injuries kag anum ang na discharge na matapos mabulong bangud sang minor injuries.
May 127 ka mga Filipino ang nadulaan sang ilistaran bangud sang missile impact, 118 ang gin-transfer sa temporary housing accomodation kag 9 ang gina process para sa resettlement.
26 naman ka OFW ang nag paidalom sa voluntary repatriation. Damlag pa may 100 ka iban pa nga mga pilgrims kag estudyante ang na repatriate na. May 50 naman ang kumpirmado para sa masunod nga repatriation.