Pagpangawat ang motibo nga nakit-ani sang National Bureau of Investigation – Bacolod sa pagpatay sa paralegal officer sang isa ka BPO Company sang nagligad nga Abril.
Suno kay NBI – Bacolod Chief, Renoir Baldovino, sa ila nga parallel investigation sa kaso ni Alex Dolorosa wala kaangtanan ang iya nga trabaho bilang organizer sang BPO Industry Employees Network ukon BIEN sa pag patay sa iya.
Wala man angut diri ang ayhan pag red tag sa iya.
“Hindi ito trabaho ng mga hired killer or ano bang sinasabi sa international news na na parang na red tag sya or state sponsored. Hindi naman related yun sa trabaho niya as para legal or kaya union. Yun ang nakikita namin kaya continuing ang investigation namin dyan”, suno kay Baldovino.
Ang Estados Unidos lakip na iban pa gid nga grupo ang naga pakamalaot sa pag patay kay Dolorosa nga nasapwan na lamang nga may 15 ka mga buno-buno sa Purok Villa Rosario sa Barangay Alijis sa Bacolod sang Abril 24.
Ang parallel investigation nga gin abiso sa ila sang Department of Justice suno kay Baldovino, ang nagapadayon.
Sa CCTV nga ila nakuha, suno kay Baldovino masiling nga kilal-anay ang gina lantaw nila tatlo ka mga suspek kag ang biktima.
Nag updanay sila nga apat sa duha ka separado nga motorsiklo kag suno sa NBI wala man sang may nakit-an nga pag pamahog sa bahin sang biktima.
Nagapati ang NBI nga taga dira man lamang ang mga suspek nga naga pabilin unidentified.
Nalakip sa ginkawat ang motorsiklo kag personal nga mga pagkabutang ni Dolorosa.