Patay ang motorcycle rider matapos makabungo sa salakyan sang LGU sang La Castellana sa Crossing Taborda, Brgy. Robles banwa sang La Castellana Sabado sang gab-i.
Ang biktima ginkilala sa kay Jay Mameng, residente sang Hacienda Conchita, Brgy. Sag-ang sang La Castellana samtang ang driver sang van ang ginkilala sa kay Cyril Caparida, 39-anyos kag residente sang Brgy. Montilla banwa sang Moises Padilla.
Suno sa kay Police Major Nelson Amsiwen, Jr., hepe sang La Castellana PNP, papauli na ang biktima gikan sa ilimnan.
Nag overtake siya sa isa ka tricycle kag nag okupar sang pihak nga lane kag nasugata sini ang van nga ginapanag-iyahan sang La Castellana LGU.
Sa imbestigasyon sang PNP, isa ka head on collision ang natabo.
Wala sang suksuk nga helmet si Mameng nga nagresulta sang iya kamatayon, ginapatihan nga yara siya sa impluwensya sang makahulubog nga ilimnon.
Detained si Caparida sa La Castellana PNP, ginahulat man sang kapulisan ang desisyon sang pamilya kun may matabo nga pag-aregluhanay.