Nasaga-id sang lalaki nga sakay sa motorsiklo ang tricycle rason nga nagtabog siya kag nalapakan sang 14-wheeler sa national highway sang Purok San Jose sa Barangay Calumangan, Bago City, Huwebes sang gab-i.
Dead on the spot ang rider nga ginkilala kay alyas “Marvin”, 41-anyos, residente sang Brgy. Tabunan sa Bago City.
Nag-gwa sa imbestigasyon nga gikan sa Bago proper kag padulong Brgy. Calumangan ang rider sakay sa motor. Gina-usoy sang motor ang outerlane apang natabu-an nga may tricycle nga naghinay kag hana nga magapundo sa higad sang dalan bangud may yara sang manaug nga pasahero.
Nakabunggo ang motor sa tricycle, kag bangud sang impact, nagtabog ang rider sa inner lane sang highway kag didto na siya nalapakan sang truck nga may karga nga tubo. Ang truck padulong man sa direksyon sang Bacolod City.
Ang driver sang tricycle nga si alyas “Rodemar” kag ang driver sang truck nga ginkilala kay alyas “Mariano”, 53-anyos, ang pareho nga gin-hold sa police station para sa dugang nga imbestigasyon.
Ginsiling ni Police Lt. Col. James Latayon Jr., hepe sang Bago PNP nga ila pa ginahulat ang istoryahanay sang magtimbang nga bahin kun sila ang maga-settle ukon magapasaka sang kaso.*
[sibwp_form id=1]