Nagtipon ang katapo sang Barangay Health Emergency Team kag mga tanod upod sa kapulisan sa barangay hall kag liwat nga ginbalikan ang puluy-an sang 45 anyos nga returning OFW sa isa ka subdivision sa Barangay Villamonte sa Bacolod kaina sang aga.
Ini matapos nga nagpamalibad siya nga magpa re swab upod sa iya duha ka mga katapo sang panimalay sang kahapon.
Ang returning OFW ang isa sa anum ka mga kaso sang Covid-19 delta variant sa Bacolod.
Sa record sang Bacolod Emergency Operation Center, Hulyo 20 sang nagpositibo sa covid 19 ang resulta sang iya swab test nga ginkuha sa iya pag abot sa Manila halin sa Dubai…kabangdanan nga siya ang na-ospital.
Sang Agosto 20, nagpauli siya sa Bacolod sang nagnegatibo na sa virus ang iya RT-PCR test.
Makaligad ang pila ka oras, nagsugot man ang OFW nga magpare swab upod sa iya asawa kag anak.
Ginpaathag ni Dr. Chris Sorongon, deputy for medical data ang analysis sang EOC, indi mapaiway ang delay sa pagpa gwa sang resulta gikan sa Philippine Genome Center bangud tanan nga local government unit ang nagapadala man didto sang mga swab specimen para sa genomic surveillance testing.
Sa sini lang nga testing center mahibaluan kun ano nga variant sang Covid-19 ang naka laton sa isa ka persona.
Gani ang ila ginalauman amo nga matagaan atensyon sang national government nga matigayon ang pagpain sang pondo para sa pag-operate sang natukod nga genome center sa Miag-ao, Iloilo province.
Samtang kahapon, nag negatibo naman sa virus ang result sang repeat RT-PCR test sa anum ka bulan nga lalaki nga lapsag nga nalatnan man sang Covid-19 Delta variant.
Negatibo man ang resulta sang RT-PCR test sang iya mga ginikanan nga close contact.