Wala sa gihapon gintugutan nga magbiya ang tanker nga MT Mary Queen of Charity sa fishport sa Old Sagay sa Sagay City.
Suno sa kay Roberto Togle ang Sagay Marine Reserve Resource Management Section Head, may clearance na gikan sa Coast Guard ang tanker pero gina hibalo pa kun may salabton sa layi ang tanker sa natabo nga molasses spill.
Nagkuha na sang water sample sang Miyerklues kag mga isa ka semana antes magwa ang resulta sang laboratory test. Samtang wala pa ang resulta, indi man maka halin ang tanker.
Suno kay PENRO Joan Grangaya wala sang leakage sa chamber sang tanker.
Gani duda nila, tuga sang kapabayaan sang crew ang natabo nga spill.
Posible wala mag shoot sa buho sang tanker sang naga saylo sila sang molasses gikan sa truck.
Gina bulubanta isa ka truck sang molasses ang nausikan sa baybay kag naglapta sa gina bulubanta 1.3 hectares sang kadagatan.
Wala man sang may gin report nga fishkill.
Lunes sang nagsugod load sang molasses ang MT Mary Queen of Charity kag sang Miyerkules nadeparahan nga may molasses spill na sa puerto.
Ang puerto ang kabahin sang Sagay marine reserve, ang pinakamalapad nga marine reserve sa Pilipinas.