Ginapaabot subong nga adlaw ang resulta sang imbestigasyon angut sa “foreign object” nga nakita sa pagkaon nga gin-donate sa Bacolod City Government Center sang Biyernes.
Sang Enero 16, Biyernes, natukiban nga may indi nagakaigo nga bagay nga yara sa isa sa mga cup sa gin serbe nga arroz caldo sa mga empleyado sang Bacolod Business Permits and Licensing Office kag mga kliyente nila.
Bangud sang natabo, gin-abisuhan gilayon ni Bacolod City Administrator Mark Mayo ang mga empleyado kag ang mga kliyente nga naka kaon nga magpa-konsulta dayon sa doktor kon makabatyag sa paglain sang pamatyag ukon pag sakit sang tiyan.
Pahayag pa ni Atty. Mayo, personal niya nakita ang isa ka itom nga bagay sa arroz caldo nga may malain nga baho.
Kapin sa 300 ka servings sang pagkaon ang ginpanagtag sa amo nga adlaw. Sa subong, wala pa sang may gin-report nga naglain ang tiyan bangud sa amo nga insidente.
Subong nga adlaw suno kay Mayo gina paabot ang resulta sang ginpatigayon nga pag pangusisa.*