Wasak ang glass wall sang Tita Pita nga restaurant sa La Salle Avenue sa Bacolod City matapos ini gin-bato Domingo sang kaagahon.
Ang tag-iya sang restuarant isa ka Israeli national nga si Shmuel Haimovitch. Istorya niya, nabugtawan siya sang makabati nga daw may nagsigabong.
Pensar niya anay may naglupok nga LPG tank pero sang iya na ini nga gin usisa nakita niya ang isa ka bato nga amo ang naka igo sa glass wall.
Daw inumol kadako ang bato nga may nasulat nga “Free Palestine”.
Nainit siya samtang gina istorya ang natabo.
May mga buka pa nga mga kristal nga naglab-ot sa iya gina tulugan.
Dugang pa niya nga nahangpan niya man nga kinamatarong sang tanan ang mag protesta pero kun tani indi man maglab-ot sa pagka bayolente.
Gilayon nila nga gin report sa pulis ang insidente.
Gina check na sang PNP ang mga CCTV footages sa area para makilala ang responsable sa pagpang bato.
Suno sa PNP wala nila gina kabig nga hate crime ang natabo kay man una, wrong spelling ang Palestine nga tinaga kag posible kuno kawatan ang sa likod sini.
Nangbato para mahibaluan kun may tawo sa sulod ukon posible man nga kompetensya sa negosyo. Sang nagligad lang nga semana may nag utod sang hose sa gasolina sang iya motor.
Nakibot na lang siya nga hinali napatay ang iya nga motor.
Sang iya na ini nga gin usisa nakita niya nga hungod nga gin utod ang hose nga gina agyan sang supply sang gasolina. Peak sang pandemic sang na stranded si Haimovitch sa Bacolod.
Nagsugod siya sa paglibod sang pita bread tubtob nakapatindog sang kaugalingon nga restaurant.
Suno sa iya, kun tani mahangpan sang naghimo sang pagbato sa iya nga restaurant nga siya ang pormal nga naga negosyo sa Bacolod kag wala naga pangita sang gamo.