May nakita ang Provincial Legal Office nga basehan sa reklamo batuk sa tatlo ka duktor kag duha ka sa mga hospital staff nga damlag pa ginpadangat sa Department of Health.
Suno kay Provincial Legal Officer Alberto Nellas, Jr., nahuman na nila ang preliminary investigation batuk sa lima kag ini ang ila na nga gin-refer sa Investigation Committee of Public Health Workers nga gina pamunuan ni Provincial Health Officer Dr Ernell Tumimbang.
Isa ka duktor kag duha ka staff sang hospital sa La Carlota ang gin-reklamo sang gina alegar corruption may kaangtanan sa irregular nga transaction sa bulong.
Duha naman ka mga duktor sa ospital sa Isabela ang ginreklamo sang maltreatment sang pasyente. Ang amo nga reklamo suno kay Nellas ang may kaangtanan sa ila pamatasan ukon behavioral issues.
Ang kasubong nga mga alegasyon ang pwede makabig nga grave misconduct suno kay Nellas. Ang komitiba na ang maga patigayon sang hearing suno kay Nellas kag maga depende naman ang tanan sa mangin resulta sang imbestigasyon sini.
“Barring any suspension and any postponement, mga 120 days siguro matapos na na siya. If the public health committee recommends the formal charge kay basi bala on their end gusto man nila i-exonerate”, suno kay Nellas.