Random drug testing sa mga city government employees ginahanda sang Bacolod LGU.
Naga-coordinate na ang katapo sang City Anti-drug abuse Council sa DOH Regional Office para sa mga test kits nga gamiton sa natalana nga random drug testing sa mga empleyado sang Bacolod LGU.
Suno kay CADAC Coordinator retired police general Primitivo Tabujara, ginahulat na lamang nila ang pagtalana sang pondo para sa mga test kits nga gamiton antes matapos ang tuig.
Sa gin-issue nga executive order no 42 ni Mayor Albee Benitez angut sa pag-establish kag pagpatuman sang drug-free workplace program, ginakinahanglan ang mandatory drug testing sa tanan nga mga job applicant sang city government.
Nalakip sa diri ang pagpatuman sang random drug testing sa mga empleyado kabahin sang pagpatuman sang mga pagsulundan sa idalom sang Republic Act 9165 kag Civil Service Commission.
Sang nagligad lang nga tuig, may 53 tanan ka mga personnel, kadam-an diri job order workers gikan sa BTAO kag POSO ang nagpositibo sa random drug testing.