Ginhawanan na sang katapo sang Bacolod Traffic Authority Office ang sidewalk sa dalan Burgos kag ila ginpakakas ang ramp nga ginagamit sang mga naga park nga salakyan.
Nakalab-ot sa atensyon sang BTAO ang litrato nga ginpadala sang isa ka netizen may angut sa sidewalk sa atubang sang Bacolod North Public Cemetery nga ginhimo parking area sang mga salakyan.
Gani ila ini insigida nga ginhawanan kag ginpakakas ang ramp nga gingamit alagyan sang mga salakyan nga naga park sa area.
Ginpahayag ni BTAO Deputy Jose Antonio Robello nga ila ipasiguro nga mapaiway ang pag-gamit sang bag-o lang nakaayo nga sidewalk agud hilway ini nga agyan sang mga pedestrian.
Sa pihak nga bahin, ginsiling ni Robello nga asta karon wala siya sang nabaton nga direktiba angut sa mahimo pagpa-untat sang ginapatigayon nga 45-day experimental parking sa dalan Lacson.
Ginpaathag niya nga ang BTAO ang nagtuman lamang sang mando ni Mayor Albee Benitez kag Bacolod Traffic Authority Council.
Damlag pa ginsiling ni Councilor Al Victor Espino, pamuno sang Committee on Transportation and Traffic nga wala pa sang approval ukon concurrence gikan sa konseho ang experimental parking nga nagatugot sa mga vehicle owners nga magpark sa dalan Lacson halin las 7 sang gab-i asta las 5 sang kaagahon kada Lunes asta Biyernes.
Libre man ang parking sa Lacson street kada weekend.