Quarantine facility sa Barangay Alijis sa siudad sang Bacolod sa madason nga tuig pa magamit bangud indi pa ini handa kag padayon pa nga gina obra sang City Engineer’s Office.
Suno kay Bacolod Emergency Operations Center Executive Director kag City Administrator nga si Em Ang, mahimo sa first quarter pa sa madason nga tuig magamit ang isolation facility bangud magluwas nga wala pa ini sang kaugalingon nga linya sang kuryente kinahanglan pa nga kay-uhon ang dalan pakadto sa lugar.
Ginpahayag ni Ang nga indi pa man karon kinahanglan ang amo nga facility bangud madamo pa sang bakante nga mga isolation rooms sa mga eskwelahan sa siudad nga nagaserbe nga quarantine facility para sa mga COVID-19 patients.
Pero sumugod sa Enero sa madason nga tuig indi na magamit ang mga eskwelahan bilang quarantine facility bangud bawi-on na ini sang DepEd.
Gani magluwas sa isolation facility sa Aljis, pagahimuon man nga dugang isolation facility sang siudad ang Bacolod Youth Center kag pati na ang evacuation center nga proyekto man sang Department of Public Works and Highways.